الزفاف.كوم اول واكبر موقع مصرى يساعد كل عروسين على تحضير الفرح المثالى. كل ماتحتاجيه من نصائح حول الزفاف، موضة افراح 2014، مقدمى خدمات الافراح فى القاهرة والاسكندرية من كوافير، ماكياج، محلات فساتين ومجوهرات. ايضا قاعات الافراح وشركات السياحة لنساعدك على قضاء اجمل شهر عسل.
عروسة ومحتاسة - 8
جبت الفستااااااااااااااااااااااااااااااااااان ، باركولى. يااااااااااااااااااااااااااااااااه احساس بالراحة رهيب. انتوا مش متخيلين الموضوع دة كان ضاغطنى ازاى. انا ماكنتش بنام. بجد. مكانش فيه اى حاجة عاجبانى و فى نفس الوقت لايقة عليا. انا كنت اتعقدت! كل ما يعجبنى واحد كان يا اما يطلع متخنى, يا مفتوح زيادة عن اللزوم, يا اما مش لايق على شكل جسمى. و اللى كان بيليق عليا كان يا اما سادة اوى, يا اما مبهرج زيادة عن اللزوم!!!
أنا كنت عايزة فستان مش فاقع أوى بس فى نفس الوقت مش سادة. يعنى أنا العروسة برضه ;). و كنت مهتمة بالديل مايبقاش فاضى كمان و دة عجبنى أويييييييييييييييييييييييى. فيه ديل بس مش طويل و بيتلم و يتشبك فى الفستان عشان وقت الحفلة بقى ;) .
فى المحل كمان ساعدونى انقى الطرحة و دى حاجة مهمة أوى. لأنك ممكن تجيبى فستان تحفة و تبوظيه لو اختارتى طرحة غلط. مبدئيا دى القاعدة: فستان بديل يبقى طرحة قصيرة. فستان من غير ديل, طرحة طويلة. و طبعا لازم تبقى لايقة على الشغل اللى فى الفستان. لو فيه دانتيل يبقى زيه و لو فستانك ستان ممكن يبقى حرفها شريط ستان رفيع بيبقى شيك أوى.
أخر حاجة مهمة برضه فى الموضوع دة, هتلبسى ايه فى رجلك؟ الفستان لازم يبقى يدوب لامس الأرض علشان مايبقاش شكله وحش و انتى ماشية و فى نفس الوقت مايترفعش اوى لما تقعدى. ركزوا فى الحاجات الصغيرة دى علشان بجد بتفرق. و أشوفكوا الاسبوع الجاى باخبار جديدة.
