عدم الرضا عن النفس مشكله كبيره جدا وليها ابعاد كثيره اوي لان الموضوع ده بيبدأ بانتقاد النفس في الشكل وبعدين الفكر وبعدين تحس انك بدأت تكره نفسك وتقلل من قيمتك لحد لما تحس انك ولا حاجه ولا حتي ليك رأي او حتي دور في المجتمع وده هيخليك انسان سطحي انطوائي و خايف جدا من ا انك تتعامل مع الناس علشان طبعا محدش يعرف عنك كل الجوانب السيئة دي .

بنسمع ونشوف ناس كثيره اوي بيقفوا قدام المرايا ويعقدوا يقولوا
"ايه ده انا تخينه انا رفيعه انا جسمي مبقع ياسلام لو كنت زي فلانه ولا علانه ياه لو شعري ناعممممم يااااااه لو عيوني ملونه وبنات تعقد تفكر ياتري انا وحشه ولا حلوة "

والسؤال الابدي هو في حد ممكن يحبني وانا كدا ؟

اهم حاجه لازم نقولها في الموضوع ده ان صورتكم دي الي انتم راسمنها جواكم ودايما مششكين فيها ومش مقدرينها ولا حتي محترمينها مهما حاولتم تداروها هي دي الصورة الي الناس شيفاكم بيها لان بمنتهي البساطة الناس بتشوفكم من عينكم يعني احنا الي بنشكل شخصيتنا وشكلنا قدام الناس .

من هنا لكل الي بيفكر بالاسلوب ده لازم يسأل نفسه سؤال مين فينا كامل ؟ احنا بشر يعني كلنا عندنا عيوب وأكيد جوانا مميزت ولازم تتاكد ان ربنا احسن خلقنا جدا المهم اننا لازم نعرف ونتعلم ازاي نقدر نفسنا ونحترمها علشان الناس تحترمنا .

كمان في نقطة ثانية مهمه جدا لازم كلما نعرفها "كل مشكله في الدنيا وليها حل "
يعني مثلا لو كنتي بتخاف تتكلم قدام الناس لانك كل اما بتيجي تتكلم بتلاقي الي يكسفك
وانت سكت لانك حسيت انك مش فاهم في الموضوع ده مش عارف تثبت نفسك فيه
يبقي مش الحل لانك تعقد وتسكت وتتكسف وخلاص وتاخد قرار انك مش هتشارك في الحوار تاني
الحل انك تبدأ تقرأ وتثقف نفسك وتحاول تتكلم تاني مع كذا حد ودايما توقع انك ممكن تغلط مره او اثنين وفي الاخر هتتعلم وهتفهم و هتكون راي خاص بيك ووجه نظر تقدر تثبت بيها نفسك .

ولكل من لا يقدر نفسه اليك بعض النصائح:-

1- تأكد ان جواك جوهرة مستنيه تخرج وتشوف النور .

2- حاول كل يوم تخرج الجوهر الي جواك وتثبت نفسك في الحاجه الي بتحبها وتكون كمان متميز فيها .

3- اعمل نقاط قوة ونقاط ضعف لنفسك علشان تقدر تقوي نقاط الضعف الي عندك وتحط ايدك علي مشاكلك وتعالجها .
4- الشكل مش كل حاجه اهم حاجه الشخصية الي تقدر تجذب الناس وتشدهم .

واهم حاجه في كل ده قبل ما تستني حد يحبك ويحترمك حب نفسك واحترمها وقدرها وارضي بحالك وأحمد ربنا كثير عليه واعرف ان ربنا خلقنا مختلفين ومش كاملين عشان نكمل بعض .

بقلم " هاجر عيسى "